Sakkortusaavitsigut attaviit nunami ledningeqanngitsumik attaveqaataapput nassitsivimmiit tigooraavimmut ingerlasuullutik.
Qaammataasaq aqqutigalugu attaveqaat aamma attaveqaataavoq ledningeqanngitsoq, sakkortusaavikkulli attaveqatigiinnermut sanilliullugu signalia qaammataasakkooqqaartussaavoq ækvatorip qulaani 35.000 km-it miissaanni qutsitsigisumi aalajangersimasumik aqquteqarluni ingerlaartukkut. Tamatuma nassatarisaanik assersuutigalugu Nuup Upernaviullu akornanni telefonikkut oqaloqatigiinneq, qaammataasamut ækvatorip qulaani 35.000 km-isut qutsitsigisumiittumut ingerlateqqaarneqartarpoq, kingornalu qaammataasamiit signali stationimut tigooraaviusumut uteqqittarluni, utimullu akisoqassagaangat signali aqqutikkut tassuuna aamma qaammataasakkoorluni utertarluni. Qaammataasat signaliinut aqquterujussuup tamatuma kinguneraa, telefonikkut oqaloqatigiinnermi tusarneqarsinnaasumik nipip kingusinaartarnera aammalu qarasaasiatigut sullississutinut piginnaasamik amikkisaartarneq, soorlu internetip atornerani.
Sakkortusaaviit atorlugit attaveqatigiinneq ingerlasinnaaqqullugu pisariaqarpoq, nassitsissutip tigooraassutillu akornanni ersarissumik isikkiveqarnissaq. Ersarissumik isikkiveqanngikkaanni imaluunniit 80 km-it sinnerlugit imminnut ungasissuseqaraanni, stationimik ataatsimik arlalinnilluunniit signalimik ingerlatitseqqiffiusinnaasunik taakku akornanni pilersitsisoqartariaqarpoq, repeater stationinik taaneqartartunik. Stationit tamakku suliaapput nammineq ingerlasinnaanngorlugit, imminnut innaallagissamik pilersortuupput, kiassartuullutik, nillusartuullutik, helikopterimut miffissaqarlutik unnuiffiusinnaallutillu. Stationit amerlanertigut qaqqat qaavini isikkiveqarluartumi inissisimasarput.