Imaatigut kabeli nunami stationininngaanniit innaallagialersorneqartunik sakkortusaateqarpoq optiskiusunik. Ajornanngikkaangat kabeli 1500 meterit sinnerlugit ititigisumi assaanneqartarpoq.
Nunnigussiviit najukkani nalinginnaasumik piumasaqaataasut naapertorlugit suliaapput akuerisaanngitsumik iserfigineqarsinnaanatik, ikuallattoqarsinnaaneranut il.il. annertunerpaamik illersuusersugaallutik. Pisortat innaallagialersuiffiinit innaallagissamik pilersugaapput batteriit, generatorillu dieselitortut pilersuissussamaataallutik (backup).
Kabeli fiberinik marlukkaanik marlunnik, tamarmik immikkut 128*10 Gbps-inik maligaasiorsinnaasunik imaqarpoq. Aallartinnermi piginnaasaq fiberini marlukkaartuni 1*10 Gbps-iusoq 2010-mi marloriaatinngortinneqassaaq. Fiberit marlukkaartut Qaqortumut nunnigunneqarput katiguffik ataaseq aqqusaarlugu, taamaalilluni Qaqortumut nunnigussivimmi ajoquteqartoqalissagaluarpat, attaveqaat Nuup Island-illu akornanniittoq atorsinnaajuarniassammat.
Kabelimik nunnigussiviit aqqutaallu tassaapput Milton, NL, Canada – Nuuk, Kalaallit Nunaat – Qaqortoq, Kalaallit Nunaat – Landeyjar, Island.
Nunnigussiviit inissisimaffissaat toqqarneqarpoq,
nunani tamalaani attaveqaateqarnermik suliallit pingaarutillit nunarsuarmi tamarmi attaveqaataasa pingaarutilimmik inissisimaffiinut isersinnaasunngorlugit.
Nunnigussiviusuniit Halifax-imut, London-imut København-imullu nalunaarasuartaatitigut attaveqaatinik atuinermik ingerlatitseqqinneq pillugu najukkani backhaul-imik tuniniaasut isumaqatigiissusiorfigineqarput, taakkunanngaanniit attaveqarneq ingerlatitseqqittarnermik sulialinnik paarlaateqatigiiffiusinnaalluni, ingerlateqqinneqarsinnaalluniluunniit assersuutigalugu New York-imut Europa-lluunniit qeqqanut.