Kalaallit Nunaanni radioqarfiit angalasunut assigiinngitsunik kiffartuussisarput.
Sullissinermi frekvensit
VHF-ikkut oqarasuaateqarneq: Radioqarfiit attavigineqarsinnaapput ajunaalernermi sullissinermut atassuteqaat kanal 16 atorlugu, Aasiaallu radioat eqqarsaatigalugu imartamut tamaanga tunngatillugu aammattaaq sullissinermi kanalikkut.
MF-ikkut oqarasuaateqarneq: Radioqarfiit attavigineqarsinnaapput ajunaalernermi sullissinermut atassuteqaat 2182kHz atorlugu.
HF-ikkut oqarasuaateqarneq: Radioqarfiit attavigineqarsinnaapput ITU kanalit nalinginnaasut atorlugit. Kanalit normui frekvensit allattorsimaffianni takuneqarsinnaapput. Frekvensit, taakkulu sumi inissisimaffii pillugit paasissutissanik annertunerusunik piniaraanni frekvensit allattorsimaffiat takuneqarsinnaavoq, atortullu teknikikkut nassuiaataat takuniaraanni link quppernerup naqqani tuugassaq toorneqarsinnaavoq.
Angalasunut nalunaarutit
Radioqarfiit piffissani aalajangersimasuni sullissinermut frekvensimikkut kanalimikkullu nalinginnaasutigut angalasunut nalunaaruteqarfissat aallakaatittarpaat. Angalasunut nalunaarutit nunarsuaq tamakkerlugu taaguutinut aalajangersimasunut ilaapput, aallakaatinneqartarpullu naak angallatit attavigineqarnissaminnik ilimagisaqanngikkaluartut.
Sinerissami nakkutilliineq
Umiarsuit 20 BT-nik taannalu sinnerlugu oqimaassusillit aammalu aalisariutit nunatsinni umiarsualiviit talittarfiillu akornanni angalasut, Sinerissami nakkutilliinermi radioqarfimmut nalunaaruteqartartussaapput.
Nalunaaruteqartarneq imatut ingerlanneqartarpoq, tassa sinerissami radioqarfik aallalernermi makkuninnga nalunaarfigineqartarluni:
- angallatip aqqa,
- suminngaanniit aallarneq nalunaaqutarlu,
- aqqutissaq,
- piffik tikiffissatut ilimagisaq nalunaaqutarlu
- kiisalu issimasut amerlassusaat.
Ulloq unnuarlu ataaseq sinnerlugu angalaneq sivisussuseqarpat angallatip ikinnerpaamik ullup unnuallu ingerlanerani ataasiarluni sumiinnini nalunaarutigissavaa. Piffissami tikiffissatut naatsorsuutigisami apuuffissamut tikikkaanni, tamanna sinerissami radioqarfinnut nalunarutigineqassaaq.
Nalunaaruteqarfissatut isumaqatigiissutigisami nalunaartoqanngippat annaassiniartartut kalerrinneqassapput.
SINERISSAMI NAKKUTILLIINERMUT ilaalernissamut kikkulluunniit nalunaarsinnaapput.
Sukumiinerusumik paasisaqarumaguit takuuk Kalaallit Nunaata imartaani angallatit nalunaaruteqartarnissaat pillugu nalunaarut nr. 170 17. marts 2003-meersoq.
Anorersuarnissaanik, anorsarinnissaanik aammalu sermernarnissaanik aarlerisaarutit
Kalaallit Nunaanni Radioqarfiit anorersuarnissaanik, anorsarinnissaanik aammalu sermernarnissaanik aarlerisaarutit DMI-meersut ataavartumik aallakaatittarpaat.
Aarlerisaarutit tiguneqartut aarlerisaarutigineqartarput aasaappat ukiuuppallu kitaani nalunaaqutaq malillugu piffissani aalajangersimasuni ukunani 0605, 1105, 1605 aamma 2105. Piffissani aalajangersimasuni aallakaatitsinerit radiokkut attaveqarnaveersaarfiup kinguninngua 2182 kHz-ikkut aammalu kanal 16-ikkut oqalulluni kalerriutigineqaqqaariarlutik sulissussinermut attaveqaatikkut atuarneqartarput.
Aarlerisaarutit, piffissat qulaani taaneqartut avataasigut aallakaatinneqartussatut tiguneqartut, MF DSC-iikkut (2187,5 kHz-ikkut), ajunaalernermi kalerrisaarinermut kanalikkut 2182 kHz-ikkut aammalu VHF kanal 16-ikkut kalerriutigineqaqqaariarlutik sulissussinermut attaveqaatitigut kanalitigullu aallakaatinneqartarput aammalu aallakaateqqinneqartarlutik radiukkut attaveqarnaveersaarfiup kingorna nalunaaquttap akunnerata affaa qaangiukkaangat.
Anorersuarnissaanik, anorsarinnissaanik aammalu sermernarnissaanik aarlerisaarutit aammattaaq HF aamma NAVTEX atorlugit aallakaatinneqartarput.
Silamik ilimasaarutit
Imartanut silamik ilimasaarutit kiisalu ullunut pingasunut Nunap Isua-nut silamik ilimasaarutit oqarasuaatikkut piniarneqarsinnaapput
- 157 (kalaallisut),
- 158 (qallunaatut)
imaluunniit KNR radioata aallakaatitaatigut.
Kalaallit Nunaanni imartat assilinerat imartat immikkoortortaanik takutitassialik, takuneqarsinnaavoq una toorlugu.
Illoqarfinnut silamik ilimasaarutit piniarneqarsinnaapput oqarasuaatikkut
- 153 (kalaallisut) aamma
- 154 (qallunaatut)
Kiisalu illoqarfinnut silamik ilimasaarutit DMI -meersut takuneqarsinnaapput una toorlugu. (java-qartariaqarpoq)
Sikunut tunngasut
Kalaallit Nunaanni Radioqarfiit ataavartumik nassiussuiffigineqartarput sikup assinginik sikullu killinginik nalunaarsukkanik Narsarssuarmi Iscentralen-iminngaanneersunik. Paasissutissat sikumut tunngasut akileraaruteqarneq ajorput.
Sikup assingi DMI-meersut Internetikkut nanineqarsinnaapput una toorlugu.
Sikumut tunngasut aammattaaq NAVTEX-ikkut nassiussuunneqartarput.
Imarsiortunut mianersoqqussutit
Nalunaarutit, imaani isumannaallisaanissamut tunngassutillit, piaartumik 'Efterretninger for søfarende’ -mi nalunaarutigineqarsinnaanngitsut imarsiortunut mianersoqqussutitut Kalaallit Nunaanni Radioqarfinninngaanniit aallakaatinneqartarput.
Imarsiortunut mianersoqqussutit tiguneqarnerminnniit siullermeertumik aallakaatinneqartarput attaveqarnaveersaarfiup qaangiunnerani, MF DSC-mi, ajunaalernermi sullissinermut atassuteqaat 2182 kHz aammalu VHF kanal 16 atorlugit kalerrisaarereernerup kingorna. Tamatuma kingorna angalasunut nalunaaruteqarnissanut ilaatillugit aallakaatinneqartarput.
Imarsiortunut mianersoqqussutit taamaallaat imartat immikkoortortaqarfiinut attuumassutilinnut aallakaatinneqartarput.
Imarsiortunut mianersoqqussutit Kalaallit Nunaata Radioa aqqutigalugu (KNR) kalaallisut qallunaatullu ulluinnarni aallakaatinneqartarput.
NAVTEX
Isumannaallisaanermik nalunaarutit (imarsiortunut mianersoqqussutit, anorersuarnissaanik aarlerisaarutit il.il.) radiotelex-ikkut frekvens 518 kHz atorlugu aamma aallakaatinneqartarput. Nalunaarutinik tamakkuninnga pissarsiaqartarniaraanni angallat NAVTEX-inut imaluunniit radiotelex-inut tigooraavimmik peqartariaqarpoq, nalunaarutinik allaganngorlugit aniatitsisartumik.
Tunumi NAVTEX-inut nassiussuivik Island-imi Reykjavik-imi inissisimavoq X-millu ilisarnaateqarluni, Kalaallit Nunaatalu sineriaani NAVTEX-inut nassiussuivik Nuup eqqaani inissisimavoq W-millu ilisarnaateqarluni, kitaata sineriaa tamakkerlugu nassiussuiffigisinnaallugu.
Nakorsamik siunnersorneqarneq
Tassanngaannartumik napparsimasoqalersillugu immaluunniit angallammi inuttaasumik annertuumik ajoqusertoqartillugu nakorsamut attaveqartoqarsinnaavoq. Sapinngisamik illoqarfimmi tikeqqaagassamiittoq nakorsaq attavigitinneqartarpoq.