VHF DSC radionut tunngasut
DSC – Digital Selective Calling – VHF radioni nutaani atorneqaleraluttuinnarpoq.
VHF DSC-radiomut GPS ikkunneqarsimappat ajornartorsiulernermi kalerrisaarineq, toortagaq ataasiinnaq kisiat toorlugu nassiunneqarsinnaavoq.
VHF kanal 16-ikkut naalaartussaatitaanerup taamaatinneqarnissaanik pilersaarutit IMO-p kinguartippai. Taamaattumik Kalaallit Nunaanni Sinerissami radioqarfinnut VHF DSC atulersinneqartussaajunnaarpoq aammalu angallatinut minnerusunut VHF DSC-nik atortoqartussaatitaaneq piumasaqaatigineqassanani. Taamaattumik inassutigineqarpoq nutaamik pisinermi VHF radiot DSC-tallit pisiarineqartarnissaat.
Taamaammat Kalaallit Nunaata imartaani ajornartorsiulernermi VHF DSC-iikkut kalerrisaarisoqalissagaluaruni angallatinit allanit VHF DSC-iilinnit – maannakkuugallartoq – taamaallaat tamanna tusarneqarsinnaassaaq.
VHF DSC radiot assigiinngitsut marluk tunngaviusumik pigineqarput:
Atortut klasse A-t VHF DSC-kkut ajornartorsiortoqalersillugu, nukinginnartumik pisoqartillugu aammalu sillimaniarnermut atasumik attaveqarsinnaanernik kiisalu nunamut nunamiillu angallatinullu allanut attaveqarsinnaanernik nalinginnaasunik periarfissiipput. VHF DSC klasse A akisuneruvoq, taanna tigooraaveqarami marlunnik, aappaa tassaalluni kanal 70-imi inissisimajuartoq.
Sunngiffimmi angallammi imaluunniit inuussutissarsiutitut umiatsiami aalajangersimasumik ikkussuussatut angusinnaasaq nalinginnaasoq 10-20 sømiliuvoq. Umiatsiaaqqani tigummiartakkatut angusinnaasaq annikinneruvoq – nalinginnaasumik 5-10 sømiliulluni. Umiarsuarni annerusuni portusuumi antenneliiffiusinnaasuni angusinnaasaq 20-30 sømiliuvoq. Kangerlunni, kangerliumanerni, qaqqat sinersillugit aammalu sikup sinaava sinertillugu piffiit ilaanni VHF-imik atuisinnaanerup ajornarsinnaanera imaluunniit qularnaatsumik atuisinnaanerup ajornarsinnaanera ilimagineqartariaqarpoq.
Tamakku saniatigut VHF DSC-nik akikitsunik peqarpoq:
Atortut klasse F-it VHF DSC-kkut ajornartorsiortoqalersillugu, nukinginnartumik pisoqartillugu aammalu sillimaniarnermut atasumik attaveqarsinnaanernik periarfissiipput. Atortup ajornartorsiortoqalersillugu, nukinginnartumik pisoqartillugu aammalu sillimaniarnermut atasumik "tusarnaarnernik", nunamiit imaluunniit angallatiniit allaniit attaveqarnernik DSC kanal 70-ikkut nassiunneqartunik periarfissiinngilaq.
Kalaallit Nunaanni angallatinut atortunik DSC-nik atortoqarnissamik piumasaqaatit pillugit innersuussutigineqarpoq Søfartsstyrelsen.