Imaatigut kabelip Nuup avataatunginnguaninngaanniit nunamut qaqinneqarnerani ajoquserneqannginnissaa suli annerusumik pinaveersimatikkumallugu, TELE-POST piffissami april – majimi imaatigut kabelip Nuup avataatunginnguani immap naqqata iluatigoortunngorlugu qillerinissanut qaqinneqartarnissaanullu suliarinnittussarsiuussivoq. Ulloq 27. maj suliarinnittussarsiuussineq naavoq, TELE-POST-illu neqeroorutaasut maanna misissorsimalerpai, ullorlu 20. juni suliffeqarfiup akissuteqarfigai neqeroorutaasut tamaasa itigartinneqarnerannik. Suliarinnikkumasut ilaasa naammasseqqaagassat arlallit saqqummiuppaat, immap naqqata ataani qillerinissami aningaasaqarnermik nalorninartorsiortitsisunik. TELE-POST-ip naammasseqqaagassat arlallit paasiniarluaqqaarallarumavai, taamaallilluni suliarinnikkumanernik ersarinnerusunik neqerooruteqartoqaqqullugu qillerinermik suliaqalinnginnermi.
”Qillerinissamut kabelinillu nunamut qaqitsinissamut akip naatsorsuutigisamit anginerunera tupaallaatigaarput, aammalu taakku saniatigut naammasseqqaagassaqarnera – pingaartumik qaarsup pissusaanut tunngatillugu. Qaarsumut tunngasut aammalu immap naqqani pissutsinut tunngasut maanna misissuiffigilerpagut, kingusinnerusukkullu aatsaat paasissavarput suliassap qaqugu aallartinneqarnissaa”, Teknisk direktør Jørn Jespersen oqarpoq.
TELE-POST-ip taamaammat nutaamik suliariumannittussarsiuussinissaq maanna suliaraa.