Nunatsinniit Københavnimut allakkanik assartuineq sivisunerusoq

Air Greenland-ip Kangerlussuarmiit Danmarkimut angallassinerminut atatillugu piffissanik allannguinerata kinguneranik nunatta kitaaniit Københavnimut allakkanik nassitsivinnut apuussiniarneq sivisunerulerpoq. Siullermisut timmisartut Københavnimut nal. 19.45 tikissaarput, maannalu nal. 21.30 tikittalersimallutik. Tamatumap nassataraa allakkat nunatta kitaaneersut, Danmarkimut apuunnerminniit aqaguani København-imi Sjælland-imilu tigusisussaminnit tiguneqassaarnerat.

Maanna timmisartut kingusissukkut apuuttarnerisa kinguneraa, Post Danmarkip allakkanik siammartiterivinnut assigiinngitsunut aqaguani agguaanneqartussanut angumeqqusinnaannginnerat. Air Greenland-ip angallassinini januarip qeqqani 2010-imi allanngortippaa.

Annertunerusumik paasisaqarusuttut Tusagassiinermut pisortamut Malînánguaq M. Mølgaard-imut email: mmm@tele.gl imaluunniit Siammartiterinermut pisortamut Lars Holm Hansen-imut lhh@tele.gl telefon 34 12 55-imut saaffiginnissinnaapput.