Internetikkut atuartitaaneq, piginnaanngorsarnerlu pillugit isumasioqatigiinneq
TELE-p Namminersorlutik Oqartussat, kommunet nunatsinnilu suliffeqarfiit allat peqatigalugit Sarfarissoq II ingerlatilerpaa, imaatigut kabelimi sakkortusaavinnilu piginnaasap annertusineratigut periarfissat tamatumuuna sammissallugit.
Atuartitsineq, ilinniarneq aamma piginnaasanik qaffassaaneq tassaapput TELEp annertuumik aningaasaliiffigisaanik atuiffiulluarsinnaasut. Sarfarissoq II-p taamaammat qulequtaraa ”e-ducation”.
Isumasioqatigiinneq Nuummi Katuami ingerlanneqassaaq ulluni 27. – 29. april, oqalugiartussat pissanganartut suliffeqarfiillu attaveqaateqarnerup internetillu Kalaallit Nunaanni siunissami atuartitsinermut ilinniartitsinermullu qanoq atorneqarsinnaaneranik tamatumuuna saqqummiussissallutik.
Ataatsimeersuarnissamut piareersaatitut 2009-mi novemberimi suleqatigiissitaliortoqarpoq arfineq-marlunnik, ullumikkut sumi inissisimanitsinnik misissuisussanik aammalu ilinniagaqarnermik ingerlatsinerup qanoq iliorluni pitsaanerpaamik teknologii atorlugu periarfissaasunik pioreersunik atorluaasinnaanermik misissuisussanik. Suleqatigiissitat attaveqaateqarnermi teknologiimik atorluaanerup sunniuteqarluarnissaa pillugu sutigut suliniuteqartoqartuarnissaanik siunnersuusiussapput.
”Sarfarissoq II pissanganartunik nutaarsiassaqarfiujumaarpoq, e-ducation-illu iluani inuit saqqumilaarnerit ilaannik oqalugiartoqarumaarluni. Kalaallit Nunaanni suleriaaseq pitsaanerpaaq qimerluussavarput uagullu imminut isumassarsiorfittut atorumaarluta.
Aamma aporfiit uagut nammineq maani suliffitsinni nalunngisagut qimerluussavagut – aammalu qanoq iliorutta ingerlaqqinnissarput oqaloqatigiissutigissallugu. Taamaammat e-ducation ullumikkut – aammalu siunissami – sammineqassaaq,” TELE Greenland A/S-imi pisortaaneq Brian Buus Pedersen oqarpoq.
Isumasioqatigiinneq Sarfarissoq II-mik taaguuteqartinneqartoq, 2008-mi augustimi Nuummi isumasioqatigiinnersuup siulliup Sarfarissoq I-ip paasissutissiinermut attaveqatigiinnermullu teknologiip (IKT-p) iluani Kalaallit Nunaanni siunissami sunik periarfissaqarneranut tunngasunik imaqartup, nanginneraa.
Isumasioqatigiinnissap nittartagaraa
www.sarfarissoq.gl, soqutiginnittullu peqataajumasut nalunaarsinnaapput ugguuna:
tilmelding@sarfarissoq.gl Annertunerusumik paasisaqarusuttut Tusagassiinermut pisortamut Malînánguaq M. Mølgaard-imut saaffiginnissinnaapput:
mmm.@tele.gl-imut, imaluunniit tlf. 34 12 55-imut imal. 541560-imut