Frimærki Arnat Ulluata ukiunik 100-nngorneranut atatillugu

Nunarsuarmi arnat ulluat 8. marts, frimærkimiliaralugu malunnartinniarneqarpoq. Tamanna pivoq ullumi POST Greenland-ip Tasiilami Nuummilu saqqummersitsineq ingerlammassuk. Saqqummersitsineq arnanit nukittuunik saqqumilaartunillu peqataaffigineqarpoq.

Ukiunik 100-inngortorsiornermut atatillugu frimærkimik saqqummersitsineq Tasiilami POST Greenland-ip frimærkiliornermik immikkoortortaqarfiani Filateliami ullaap tungaa aallartinneqarpoq. Filateliami nioqqutissiornermi pisortaq Judithe Ignatiussen aammalu atuisunut sullissinermut pisortaq Tina Vestergaard sulisut sinnerlugit oqaaseqarput. Tamatumap kingorna Kommuneqarfik Sermersuup borgmesteria, Asii Chemnitz Narup attortinnartumik oqalugiarpoq,

”Eqqumiitsuliortup frimærkiliamigut ilisarnartumik takutippaa, Kalaallit Nunaanni inuiaqatigiinni arnat nukittunerat sulinerallu. Tamanna peroriartorninni eqqaamalluarpara: inuit qummut ingerlaartutut ittut, imminnut qanittumik ataqatigiissut, killiliussanillu qaangiillutik naassaanngitsumut ingerlaartut. Aamma ilusilersukkat tarninut assigupput – kalaallip arnap nukingata inuiaqatigiinnut atanera, nutatererusuttuarnermullu piumassuseqarnera.” Asii C. Narup ilaatigut oqarpoq.

Frimærki ualimut Nuummi saqqummersinneqarpoq. Frimærkinik tuniniaanermut pisortap, Allan Pertti Frandsen-ip, frimærki taassuminngalu qalipaasoq Naja Rosing-Asvid ilisaritippai. Kalaallit Nunaanni suliniaqatigiiffimmi 8. marts-imi siulittaasup, Inge Olsvig Brandt-ip kiisalu Grethe Siegstad-ip, Nuummi Qimarnuimmi pisortaasup, Naja Rosing-Asvid, POST Greenland-ilu frimærkimik kusanartumik saqqummersitsinerannik qutsavigaat.

Apeqqutissallit TELE-POST-imi Tusagassiinermut pisortamut Malînánguaq M. Mølgaard-imut, tlf. +299 341255-imut email mmm@tele.gl –imut saaffiginnissinnaapput, imaluunniit Frimærkinik Tuniniaanermut pisortamut Allan Pertti Frandsen-imut tlf. +299 341810-mut, email apf@tele.gl -imut.