2010-mi Ataatsimeersuarneq aamma Ukiumoortumik nalunaarut 2009

TELE Greenland A/S ileqquusumik 2010-mi ullumikkut ataatsimeersuarpoq, ingerlatsiviup ukiumoortumik nalunaarutaa 2009-mut tunngasoq piginnittumit – Namminersorlutik Oqartussanit – Naalakkersuisunut ilaasortamik Jens B. Frederiksen-imik sinniisuutitaqartunit akuerineqarluni.

Suliffeqarfissuup akileraarutit ilanngaatiginagit 2009-mi naatsorsuutini angusai 63,6 mio. kr.-upput. Siulersuisuni siulittaasup Kaj Egede-p oqalugiarnermini suliffeqarfissuup angusai ilimagineqareersutut ukiut siuliinut naleqqiullutik ikinneroqisut naammagisimaarlugit oqaatigai. Akileraarutit ilanngaatigereerlugit angusat 46,8 mio. kr.-iupput. Siulersuisut ataatsimeersuartunut inassutigaat piginnittut iluanaarutininngaanniit 30 mio. kr.-inik tunineqassasut, tamannalu Namminersorlutik Oqartussanit akuerineqarpoq.

Suliffeqarfissuup akileraarutit ilanngaatiginagit angusai, TELE Greenlandip niuernermut ingerlatsiviinut ingerlatseqatigiiffiinullu imatut immikkoortiterneqarput:

	2009 mio.kr.		2008 mio.kr.
Niuernermik ingerlatsivik TELE	57,8		88,7
Niuernermik ingerlatsivik POST	7,9		8,4
TELE Greenland A/S	65,7		97,1
TELE Greenland International A/S	(2,1)		7,8
Suliffeqarfissuup akileraannginnermi angusai	63,6		104,9

TELE-p angusaasa appariarnerujussuat siullermik ernianik annertoorsuarnik, nalikilliliinernik aammalu imaatigut kabelimik ulloq 23. marts 2009-mi atuilernerup kingunerisaanik ingerlatsinermi allanik aningaasartuuteqarnernik pissuteqarpoq. Tamatuma saniatigut internetimut nioqqutini ADSL-imi aamma MPLS-imi 2009-mi akinik appartitsinerit Internetimik atuinerup annertusineranut suliffeqarfiup aningaasatigut isertitaanut malunniutinngitsoorpoq.

” Takusinnaavarput atuisorpassuit atuinerminnik annertunerulersitsisimasut, aammalu taakkuusut nioqqutitsinnik akikillinerpaasatsinnik atuilersimasut – taamaalillutillu 2009-mi atorluaallutik. Tamanna aamma pissutaalluni atuineq annertusiartoraluartoq, TELE-mi kaaviiaartitat amerlisimanngillat,” taama oqarpoq siulersuisuni siulittaasoq Kaj Egede.

POST-ip angusai ukioq manna aamma allakkat nassiunneqartartut ikiligaluttuinnarnerannit sunnerneqarput, frimærkinullu tunngassuteqartunit nioqqutinit tunisat – pingaartumik frimærkit eqqarsaatigalugit – aningaasarsiornermi ajornartorsiornerup kingunerisaanik ukiorpassuarni aatsaat taama annikitsigaat. POST-ip ukiumi qaangiuttumi ingerlatsinini pisariillisarpaa, taamaaliornermigut angusatigut pitsaasumik angusaqarumalluni.

TELE-POST-ip pisortaanerata nuannaarutigalugu oqaatigaa, naak TELE-mi aamma POST-imi unammilligassaqaraluaqisoq 2009 anigorneqarluarsimasoq. ”Ukiut pissanganarluinnartut aqqusaarsimavagut, ilaatigut TELE-p oqaluttuarisaanerani attaveqaateqarnermi aningaasaliissuteqarnerit annerpaat. Taama amerlatigisunik aningaasaliissuteqarnerit kinguneriuartarpaat aningaasaqarnermi angusat eqqarsaatigalugit nalornissuteqarsinnaaneq, ajunngitsumilli angusaqarpugut, maannalu nioqqutitigut periarfissarpassuit teknologiip nutaap periarfissarititaaniittut sammisinnaanngorpagut,” pisortaaneq Brian Buus Pedersen oqarpoq.

TELE-p immikkoortortaqarfiata aappaagumut naatsorsuutigai angusat 2009-minngaanniit appasinnerunissaat, tassami 2010 tassaasussaavoq ukioq ilivitsoq siulleq imaatigut kabelimik ingerlatsiviusoq, taamaalillunilu tamakkiisumik aningaasartuuteqarfiusussaq. TELE-p ukiuni aggersuni nioqqutinik nutaaliorneq malinnaaffigeqqissaassavaa, nioqqutiniillu allarpassuarnit nutaanit siulliulluni junimi mobilt bredbånd saqqummiunneqassaaq.

Kaj Egede-p erseqqissarpaa atuinerup annertusiartornera ilutigalugu attaveqaatinut tunngasut nioqqutit akii appariartuaartinneqassasut – ilaatigut nioqqutimi imartunerulernissai, atuisut taamaalillutik aningaasaatiminnik suli pissarsinerusinnaaqqullugit.

POST-ip taamatuttaaq naatsorsuutigaa 2010 aningaasaqarnermini annikinnerusumik angusaqarnissani avataani aningaasartuuteqarnerunermik allakkallu nassiunneqartartut suli ikiligaluttuinnarnerannik pissuteqartumik.
Siulersuisuni siulittaasup Kaj Egede-p ingerlatsivimmi sulisut aqutsisullu ukiumi qaangiuttumi sulilluarsimanerat pillugu qutsavigai, siulersuisullu tamaasa aammalu Naalakkersuisut taamatuttaaq suleqatigilluarsimanerannik qutsavigalugit.

Piginnittut nalunaarutigaat siulersuisunut ilaasortanngortut nutaat tassaasut Agner Mark, Søren Voigt kiisalu Nauja Bianco. Siulersuisuni siulittaasoq Kaj Egede, Svend Hardenberg aamma Lars Lennert-Sandgreen siulersuinut ilaasortaajunnaarput. Siulersuisuni siulittaasunngorpoq Agner Mark.

Allanik paasisaqarumagaanni Pisortaanerup allattaa Jeppe Jensen attavigineqarsinnaavoq tlf.: 341255-imut imaluunniit allaffigineqarsinnaalluni uunga e-mail jeppe@tele.gl 

Inussiarnersumik inuulluaqqusilluta
TELE-POST