Kalaallit Nunaata atortussat pigai, atorneqartariaqalerput

Ilinniartitaaneq qaffassarniarlugu suliniuterpassuusimapput. Ajunngitsup tungaanut ingerlavugut, tamanna nuannaajallannartuuvoq uatsinnullu piumaffiginerunissamut nutaanik nukissaqalernarluni.
     Kuupik Kleist-ip 2010-mi ukiortaami oqalugiaataaneersoq

Kalaallit Nunaanni piginnaasat – piginnaanngisallu oqaluuseriinnarnagit iliuuseqarfigineqarniarput.
Isumasioqatigiinnermi Sarfarissoq II-mi 27.-29. april ingerlasussami siunissami ilinniartitaanermi unammilligassat e-ducation-ip atorluarneratigut anguneqarsineqarsinnaanerat sammineqassaaq. Isumasioqatigiinneq taamaalilluni inuiaqatigiit kalaallit ineriartorneranni pingaarutilerujussuanngorsinnaavoq.

Inuiaqatigiit teknologiimik nutaaliaasumik soqutiginninnerisigut, Kalaallit Nunaat nunarsuarmi paasissutissiinermik attaveqatigiinnermillu teknologiimik (IKT-mik) atuisunut siuttunut ilanngussinnaavoq. Imaatigut kabeli aammalu nunarsuarmi attaveqaatinut sakkortusaavik takinerpaaq pigineqarput, taamaammallu Kalaallit Nunaata iluani, nunallu allanut attaveqaatinik atuinerup annertusarnissaa periarfissaavoq. Minnerunngitsumik ilinniartitaanerup iluani IKT-p periarfissat nutaat ammaappai, tamakkulu Sarfarissoq II-mi workshop-it aqqutigalugit aammalu assigiinngitsunik piginnaasallit arlalissuit oqalugiarnerisigut saqqummiunneqassapput.

E-ducation – siunissami unammilligassat ilaat

Namminersornerup piviusunngortinnissaanut Kalaallit Nunaat imminut aningaasatigut napatinnissaminut annertuunik unammilligassaqarpoq. Tamanna angussagaanni ukiuni aggersuni qaffasissunik qaffasinnginnerusunillu ilinniarsimasut amerlasuut pisariaqartinneqarput. Teknologiip iluani siuariartornerit nutaanik periarfissiisarput.

Taamaammat Sarfarissoq II-mi sammisassaq pingaarneq tassaavoq e-ducation, tassanilu teknologiip periarfissarititai, atorluarnissaanullu periusaasinaasut qulaajarneqassapput. Tassunga atatillugu maanna Kalaallit Nunaanni inissimanerput aallavigalugu suliat aallartinneqarsimapput. Taakku isumasioqatigiinnermi saqqummiunneqassapput, maannakkorpiarlu killiffimmik ersersitsisallutik. Taamaalillutik isumasioqatigiinnermi peqataasut ingerlariaqqinnissamut ataatsimoorussamik aallavissaqassallutik.

Sarfarissoq II-p ingerlanneqarnissaani nutaaliarpassuaqassaaq. Aamma nutaaliorneruvoq isumasioqatigiinneq, TELE-POST Greenland A/S-ip, Kalaallit Nunaanni Ilinniartitaanermut Aqutsisoqarfiup (KIIIA) aammalu Aningaasaqarnermut Sulisoqarnermullu Aqutsisoqarfiup - nunatsinni pisortatigoortumik IKT-mik pilersaarusiornernik ataqatigiissaarinermik akisussaasuusup - akornanni suleqatigiissutigineqarnera. Taamatut suleqatigiinnerit tassaapput susassaqarfinnut attuumassuteqartunut tamanut siammartariaqartut.

Suleqatigiissinnaagutta killilersuutissanngilagut

”IKT nunani allani atussalllugu pitsaalluinnarsimapput, taava Kalaallit Nunaanni atussallugu marloriaammik ajunngequteqarsimassaaq”, isumasioqatigiinnissamik pilersaarusiornermut aqutsisoq Jesper Kreiner Nuummi Kompetencekompagni-meersoq oqarpoq. 

”Isorartoqisumi siammarsimasunik inulimmi, IKT tassaalluinnarpoq ungasinnerusoq isigalugu namminersornerup iluani anguniakkat angunissaanut pingaarutilimmik inissimasut ilaat. Atortussat pigilereerpavut. Periarfissat atornissaannut uagut apeqqutaaginnarpugut."

"Periarfissanik atorluaasinnaavugut nukiit pigeriikkavut aallaavigalugit – taakkulu saqqummiullugit. Attaveqaatitigut aaqqiissuussaanikkut atortugut ullumikkut assut pitsanngoriarsimapput, apeqqutillu uatsinnut killilersuisarsimasut ilarpassui maanna iliuuseqarfigisinnaanngorsimavagut. Taamaaliussaguttali suleqatigiissinnaasariaqarpugut. Suleqatigiissinnaavugut taamaaliortariaqarlutalu. Maanna suleqatigiinnissamut piumassuseqarnerput piginnaanerpullu takutipparput, isumasioqatigiinneq pilersaarusiorneqarlunilu ingerlanneqartussanngormat, suliffeqarfiit assigiinngilluinnartut pingasut - siornatigut akunnerminni taamatut suleqatigiissimanngitsut - suleqatigiissinnerisigut” Jesper Kreiner oqarpoq.

Sarfarissoq II

Sarfarissoq aaqqissuussaavoq amerlasuunit peqataaffigineqarlunilu, siunissamut inuiaqatigiinni IKT-mik atuineq aallaavigalugu siunnerfissanik tikkuussisussaq. Sarfarissoq isumaqarpoq ”imaani sakkortuumik sarfaqarfik” – tassa imaappoq, immami sarfaqartumi imeq “nutaanngorsartuarpoq ineriartorfiullunilu”.

Sarfarissoq 2005-imili pisuni assigiinngitsuni atorneqartarpoq: Pisortassanik ilinniartitsinermi, suliani annertuuni – kingullertigullu IKT, pilersaarutit ilinniartitsinerlu qulequtaatillugit isumasioqatigiinnerni. Sarfarissoq I taamaalilluni tassaasimavoq TELE Greenlandip 2008-mi isumasioqatigiissitsineranut taaguutaasoq, imaatigut kabelip periarfissiissutigisaanik ammaassisussanut. Periarfissat tamakku maanna piviusunngorput.

Sarfarissoq II-kkut anguniarneqartut siamasipput. Namminersortut akornanni pisortanilu aalajangiisartuniit nuna tamakkerlugu aammalu kommuneni politikeriniit, ilinniarfinni akisussaasunut, perorsaasunut Sulisoqarnermilu immikkoortoqarfinni sulisunut – allaallu nutaaliortunut maligassiuisunullu.

Programmi isumasioqatigiinnerup nittartagaani - www.sarfarissoq.gl –imi takuneqarsinnaavoq, tassani aamma isumasioqatigiinnermut peqataanissamut nalunaartoqarsinnaavoq.

Nittartagaq nutarterneqartuartoq pilersaarutinik sukumiisunik aamma imaqarpoq aammalu paasissutissarpassuarnik allanik imaqarluni.

Annertunerusumik paasisaqarusuttut Tusagassiinermut pisortamut Malînánguaq M. Mølgaard-imut saaffiginnissinnaapput: mmm.@tele.gl-imut, imaluunniit tlf. 34 12 55-imut

Inussiarnersumik
inuulluaqqusilluta

TELE-POST