Kalaallit Nunaata Canada-llu akornanni imaatigut kabelimi Greenland Connect-imi attavik ajoquteqarpoq

Ajoqut nunatsinni aammalu Kalaallit Nunaanniit nunarsuatsinni allamut attaveqaatinik atuinermut ajoqutaassanngilaq, taakkunani attaveqaammik atuineq tamarmi imaani kabeli Island-ikkoortoq aqqusaarlugu ingerlasarmat.

Ajoqut atuisunut Island-ip Canada-llu akorna attaveqaammik toqqaannartumik attaviligaasumik atuisunut eqquissaaq, atuisullu taakku TELE-p attaveqarfigai.

Ajoqut TELE-p teknikeriisa sumiiffissivaat, tassalu Nuup avataani imartamiittutut/kangerluup avataaniittutut, ajoqutaalersimasullu tassaapput attaveqaatit atorneqarnerinik nassiussuisuusuni fiberini ajoquteqalernerit. TELE-p atortussanik pilersuisoq tamakkuninnga iluarsaasinnaasoq attavigaa, qanorlu suliarinnittoqarnissaanik pilersaarusiorneq sukumiinerusoq aallartillugu.

TELE-p ajoqummik aaqqiinissaq nakkutigeqqissaarpaa, allanillu paasissutisseeqqikkumaarluni.

Apeqqutissaqarnermi TELE-POST-imi attaveqatigiinnermut pisortaq Sæunn L. Nolsøe, sunn@tele.gl, tlf. +299 341255-imut saaffigineqarsinnaavoq.

Inussiarnersumik inuulluaqqusilluta
TELE Greenland A/S