Videokonferencerutit nutaaliaalluinnartut ministerit atoqqartippaat
TELE Greenland-ip Telepresence-itaavi – videokonferencertarfiit nutaaliaalluinnartut – ullumi 18. aug. Kalaallit Nunaanni Danmark-imilu ataatsikkut atoqqaartinneqarpoq.
Init taakku pilersinneqarneranut siunertaavoq atuisut Atlantikoq ikaarlugu angalaqqaanngikkaluarlutik ataatsimeeqatigiittarnissaat. Imaatigut kabeli iluaqutsiullugu, teknologi qaffasissoq atorlugu Nuup Hellerup-illu Danmarkimiittup akornanni attaveqatigiittoqarsinnaalerpoq.
Atoqqaartinneranut atatillugu TELE Greenland A/S-imi pisortaaneq Brian Buus Pedersen Nuummi tikilluaqqusivoq, tamatumalu kingorna Attaveqarnermut Angallannermullu Naalakkersuisoq Jens B. Frederiksen aamma Nuummiittoq qalersamik kipisilluni, pilluaqqusillunilu oqaaseqarnermini ilaatigut ima oqarpoq.
”Taama pitsaatigisunik atortoqarluta videokonference-sinnaalernitta kingunerisinnaavaa – ingammik pisortat eqqarsaatigalugit – angalanernut atugassaraluanik aningaasanik sipaarsinnaanissaq. Aamma isumaqarpunga periarfissaq manna namminersorlutik ingerlataqartut paaseriarunikku, sipaarutissaminnik nassaarfigisinnaassagaat. ”
Danmark-imiit Ilisimatusarnermut Naalakkersuisoq Charlotte Sahl-Madsen Hellerup-imi Telepresence-ertarfimmiit peqataavoq, ilaatigullu oqarluni: ”Isumaqarpunga Telepresence-itaaq qiviassagaanni Kalallit Nunaanni periarfissarpassuaqartoq, minnerunngitsumik imaatigut kabeli eqqarsaasitigalugu. Tupinnaqaaq, teknikkikkut periarfissat taama pitsaatigimmata, unalu periarfissaq anguniakkassinnut takorluukkassinnullu, digitalisering, ilinniartitaaneq, ilisimasanillu avitsiqatigiissinnaaneq eqqarsaatigalugit periarfissarpassuit ilagaat.”
Ataatsimiittarfik nutaaq aningaasat, piffissarlu eqqarsaatigalugit sipaarutissartaqarpoq, teknikkitaalu avatangiisinut eriaginnittuulluni: Atlantikoq ikaarlugu angalanissaraluanut aningaasat piffissarlu sipaarneqassapput. Qularnaatsuuvoq, angalaniartilluni silap akornusersuisinnaasarneri malunniutissanngillat. Aammattaaq pinngortitamik illersuisuuvoq, C02-mik aniatitsinermut annikillisaasuulluni.
”Inip Danmarkimut nunanullu allanut angalasarnerit akisoqisut sivisusinnaasartullu unammillersinnaavai. Ini iseruminartuuvoq, kusanarluni, nipigillunilu, assullu Nammisorluni Oqatussanut, suliffeqarfinnut, kattuffinnullu piukkunnarluni.” TELE Greenland-imi pisortaaneq Brian Buus Pedersen oqarpoq.
Annertunerusumik paasisaqarusuttut Tusagassiinermut pisortaq Malînánguaq M. Mølgaard attavigisinnaavaat mmm@tele.gl imal. tlf. +299 341255
Inussiarnersumik inuulluaqqusilluta –
TELE-POST