Nammineerluni nassitsiviit atorneqaraluttuinnarput
Nammineerluni nassisitsiviit automatit nunarsuarmi tamarmi atugaaleraluttuinnarput. Atuisullu taakku assut iluaraat, pissutissaqarluaramik. Nammineerluni nassitsiviit atulernerisa kinguneranik, piffissaq naalagaavallaarunnaarpoq, piffissarlu nassiussiartorfiusinnaasoq sivitsorluni. TELE-POST-ip aningaasanik tigusisarfii tamatumunnga assersuutissaalluarput. Kalaallit Nunaanni tamarmi 2009-mi aningaasanik tigusisarfinni 1 mio.-nit missaat suliarineqarsimapput.
Taakkununnga assigusut, nammineerluni – Nassitsiviit - nunarpassuarni atorneqalersimapput, nunanilu assersuuffigisartakkatsinni, soorlu Savalimmiuni, Danmarkimilu, atuisunit atorumaneqarlualersimallutik. Taamaattumik 2009-mi oktoberimiilli Nuummi atuisunut Nassitsivik atugassatut periarfissiissutigisimavarput. Tassuuna allakkat kiisalu poortukkat 35 kg angullugit oqimaassusillit nassiunneqarsinnaapput. Aammalu Akiliut imaluunniit Dankort atorlugu akiliisoqarsinnaalluni. Ulluinnarni ullaakkut nal. arfinerniit unnukkut nal. arfineq-pingasunut, kiisalu arfininngornikkut/sapaatikkut nal. arfineq-pingasuniit ualikkut sisamat tungaanut nassiussiartortoqarsinnaasarpoq. Maannalu takuneqarsinnaavoq Nuummi Nassitsivimmik atuisartut amerligaluttuinnartut.
2010-mi martsimi TELE-POST-ip Nassitsiviit allat pingasut atulersippai. Uummannami, Kangerlussuarmi, Narsamilu sullitatta Nassitsissiviit aamma atorsinnaanngorpaat, taamaalillutillu pisariinnerusumi,k eqqaannerusumillu nassisitsinnaanngorlutik.
”Nassitsivinnik atuisartutta periarfisssinneqarnertik iluarisimaaraat maluginarpara, aammalu siunissami atorluarneqarnissaat ilimagalugu”, Postdirektør Per Svendsen oqarpoq, nangillunilu ”Taamaammat aamma atuisugut periarfissamik taassuminnga annerusumik paasissutissinniarpagut.”
TELE-POST-ip pilersaarutigaa, illoqarfinni allani Nassitsiviit allat qulit ikkussuunnissaat. Tamanna pissaaq 2010-p ukiuata affaani kingullermi. TELE-POST isumaqarluinnarpoq, taama periarfissiineq aningaasanik tigusisarfiit assigalugit atorneqaleraluttuinnassasoq, aammalu Nassitsiviit atuisunut suli annertunerusumik iluaqutaalissasut.
Apeqqutissallit TELE-POST-imi Tusagassiinermut pisortamut Malînánguaq M. Mølgaard-imut, tlf. +299 341255-imut email
mmm@tele.gl –imut imaluunniit Nuummi TELE-POST Centerip pisortaanut Susanne Kristensen-imut,
suk@tele.gl, tlf. 34 18 13-imut saaffiginnissinnaapput.