TELE-p mobildata-mut akit affaannanngortippai

Mobildata-mut aki MB-mut ataatsimut 10 kr.-imiit MB-mut ataatsimut 5 kr.-inut apparneqassaaq/affaannanngortinneqassaaq, TELE-POST-illu mobilinut attaveqaataanik atuisunut, tassalu GSM-imik aamma TUSASS-imik atuisunut tamanut atuutissaaq.

”Mobilt Bredbåndip atuutilersinneranut atatillugu Nuummi mobildata-mut attaveqaammi sukkassutsit nutaat augustimi atuutilersippagut, maannalu pingaarutipparput sullitatta mobilillit aki eqqarsaatigivallaarnagu attavimmik tassannga iluarinnillutik atuisinnaanissat. Kalaallit Nunaanni tamarmi atuisugut akit nutaat iluaqutigissavaat, taamaalillutillu mobiltelefonertik atorluarnerusinnaassallugu, allagarsiaminnik misissuilluarnerusinnaassallutik imaluunniit internetimik atorluaanerusinnaassallutik,” Tele-mi pisortaq Anders Barslund oqarpoq.

”Piffissami kingullermi takusinnaasimavarput mobildatamik atuineq qaffassimasoq, taamaammallu akit taama annertutigisumik appartissinnaalerpagut,” Anders Barslund nassuiaavoq.

Akinik appaanerup saniatigut TELE-POST-ip aammattaaq pilersaarutigaa mobililinnut ataatsimoortumik nioqqummik oktoberimi atulersitsinissani. Atuisut tamatumuuna neqeroorfigineqassapput 300 MB-it 300 kr.-lernissaannik, tamannalu ilaatigut annertunerusumik atuisunut smartphones-ilinnulluunniit naatsorsuussaassaaq.

”Aallaqqaammut GSM-imik atuisunngornermut ilanngussatut pisiarineqarsinnaassaaq, taamaalillutik atuisut mobiltelefoniminnik interneternermut atuerusulluinnartut taamaaliornissaminnut annerusumik periarfissinneqassapput,” Anders Barslund oqarpoq.

Kalaallit Nunaanni TELE-POST Centerit tamarmik mobildata-mut akit nutaat malunnartissavaat smartphones-it immikkut toqqakkat 25 procentinik 1. septemberimiit 11. september 2010 ilanngullugu akikillinerisigut.

Allanik paasisaqarumagaanni Tusagassiinermut pisortaq Malînánguaq M. Mølgaard attavigineqarsinnaavoq mmm@tele.gl –ikkut, sianerfigaluguluunniit tlf. +299 341255-imut. 

Inussiarnersumik inuulluaqqusilluta

TELE-POST