Frimærki kusanarnerpaaq toqqaruk

Europami allakkeriveeqqat arlallit ataatsimut SEPAC-imik taaguuserlugu 1996-imili suleqatigiilerput. Taanna naalisaaneruvoq ”Small European Postal Administration Cooperation”-imut. POST Greenland aallaqqaataaniilli ilaasortaavoq, ullumikkullu siulittaasumut tullertut inissisimatitaqarluni.

SEPAC ullumikkut ukunannga ilaasortaaffigineqarpoq: Kalaallit Nunaat, Savalimmiut, Island, Åland, Jersey, Guernsey, Isle of Man, Liechtenstein, Luxembourg, Monaco, San Marino, Gibraltar aamma Malta. Suleqatigiiffimmi ilaasortat tamarmik nunaminni minnerusunik suliaqarfeqarput unammilligassaallu assigiillutik. Taamaammat suleqatigiinnerat pissusissamisuuginnarpoq.

Nunat SEPAC-imut ilaasortat marloriarlutik, 2007-imi aamma 2009-mi, qulequttamik ataatsimoorussaqarlutik frimærkinik saqqummersitsisarput.

2010-mi maajip arfernani SEPAC frimærkit 2007-imi aamma 2009-mi saqqummersitaasut akornanni toqqaasitsisoqarnisaanik nalunaaruteqarpoq. Toqqaasussat nunarsuarmi tamarmeersut tamarmik immikkut SEPAC-imi ilaasortat frimærkiisa akornanni kusanarnerpaatitaminnik ataatsimik toqqaassapput.

POST Greenland unamminermut peqataavoq frimærkinik marlunnik toqqagassaateqarluni: Siulleq G390 2007-imeersoq. Frimærkip takutippaa Nuka K. Godtfredsen-ip nunatta qaqqaanik titartagaa.

Aappaa tassaavoq G428. Frimærkip taassuma takutippaa nunatta pisortatiguunngikkaluamik naasua Niviarsiaq sermeq iigartartoq tunuliaqutaralugu. Asseq Narsameersup John Rasmussen-ip assilisaraa.

Ukiup matuma aallartilaarnerani frimærkinik katersisartut nunarsuarmi tamarmeersut frimærki taanna ”2009-mi Kalaallit Nunaata ukiup frimærkia”-tut qinerpaat. Nunani SEPAC-imut ilaasuni toqqaasut toqqaaneri kisinneqareeriarpata paasinarsissaaq Nuka Godtfredsenip imaluunniit John Rasmussenip frimærkiliaa suli annerusumik nersorniarneqassanersoq.

Toqqaaneq oktoberip 30-ata tungaanut ingerlassaaq. Toqqaasoqarsinnaavoq SEPAC-ip nittartagaatigut www.sepacstamps.eu –kkut imaluunniit nunat SEPAC-imut ilaasut frimærkinik tuniniaavissuarni saqqummersitsinersuarnilu peqataaneranni saqqumitinneqartartut toqqaanissamut allattuivissat atorlugit.

Toqqaaneq naammassippat eqqugassat annerit, tassalu 6.000 Euro-t, makitsissutigineqassapput. Makinneqarluni iluanaartussaq toqqaasimasut tamarmik akornannit makinneqassaaq. Eqquisup aqqa frimærkilu ajugaasoq www.sepacstamps.eu –kkut nalunaarutigineqassaaq ulloq 15. november 2010, taannalu aamma www.stamps.gl -ikkut kiisalu Greenland Collector-ikkut 2011-mi januarimi saqqummiunneqassaaq.

Inussiarnersumik inuulluaqqusilluta

TELE-POST