Frimærkit nutaat ”Erfalasorput ukiuni 25-ni” aamma ”Buuarsikkut”

Frimærkimi siullermi malunnartinniarneqarpoq Nunatta erfalasuata kusanaqisup ukiuni 25-ni piusimanera. Aappaani titartakkat nuannarineqaqisut Buuarsikkut saqqummersinneqarput.

Frimærki ”Erfalasorput 1985 – 2010”
Eqqumiitsuliortup Kalaallillu Nunaanni Namminersornerullutik Oqartussani allaffimmi pisortaasimasup soraarninngortup Thue Christiansen-ip, ukiut 25-t matuma siornatigut Erfalasorput ilusilersorpaa. Ukiunilu siullerni 25-ni Erfalasutta piumasimaneranut malunnartitsinermi Thue Christiansen-ip nammineq frimærki suliaraa. Frimærki kusanaqisumik ilusilersugaavoq, offset-imik naqitaalluni aammalu allakkat nalinginnaasut nunatta iluani timmisartukkut nassiunneqartut 20 g.-illu angullugit oqimaassusillit nalinganik 7,00 kr.-imik akeqarluni.

Ukioq manna POST Greenlandip frimærkinik katersisartunut atuagassiaanut, Greenland Collector-imut, Thue Christiansen erfalasup pilersikkiartuaarnerani misigissutsini eqqarsaatinilu pillugit ima oqarpoq:

”Kalaallit eqqumiitsuliortut arfineq-marluusugut qinnuigineqarpugut sanningasortaqanngitsumik siunnersuusioqqulluta. Siunnersuutigullu sanningasortalinnik siunnersuuteqartunut unammillertinneqarput. Naluneqanngitsutut siunnersuutiga ajugaatinneqarpoq. Imatut decembarip 17-anni 1985-imi Inatsisartut siulittaasuata ilisimatippaanga:

“Tusagassiornermi ikiorti Thue Christiansen. Asasara Thue. Pissutissaqarlunga matumuuna nalunaarutigissavara Kalaallit Nunaata erfalasussaatut sujunnersuutigisimasavit atorneqalernissaa Inatsisartut 14. februar 1985 ataatsimiinnerminni akuersissutigimmassuk, 14-it akuersillutik 11-t akerliusut.
Jonathan Motzfeldt
Inatsisartut siulittaasuat”

Inatsisartut toqqaareernerisa kingorna erfalasoq pillugu oqallinneq annertoqaaq. Ullumikkulli atuutilerneraniit ukiut 25-it qaangiuteriannguartut erfalasorput nalinginnaasutut atorneqalerpoq ataqqineqarluni nuannaarutigineqarlunilu.
Kalaaleqatikka tamassi erfalasup 25-liinerani pilluaritsi.”

Frimærki ”Buuarsikkut”
Eqqumiitsuliortup titartaasartullu Robert Holmene-p titartakkat quianartuliat nuannarineqaqisut ”Buuarsikkut” 2001-imi titartartalerpai. Qallunaatut taaguuteqarput: ”Boas & Co.” Titartakkat Nuuk Ugeavis-imi saqqummiunneqarput, kingusinnerusukkullu TELE-POST-imit, IF-forsikring-imit aammalu Kommuneqarfik Sermersuumit saqqummiunneqartalerlutik. Taakku saniatigut sap. ak. saqqummersartup Sermitsiap titartakkanit quianartunit taakkunannga nutaanik akuttunngitsumik ilanngussisarpoq. Buuarsikkut kiisami atuagaarannguanngorlutik saqqummersimapput.

Frimærkimi ersarilluartumik nunarsuatta kissatsikkiartornera takutinneqarpoq. Nannup puisillu 1990-imi 2010-milu inuunerat siusinnerusukkut allaanerulaartunngorlugu saqqummersinneqareerpoq. Robert Holmene-p titartagaq allanngortilaarlugu frimærkip frimærkip angissusaanut tulluartunngortippaa.

Frimærki Buuarsikkunnik titartagartalik POST Greenlandip saqqummiuttagaasa ”Kalaallit titartagaat nangeqattaartut” nuannarineqaqisut aappassaraat. Buuarsikkunnik frimærkiliaq offset-imik naqitaavoq naleqarlunilu 23,50.kr-inik, taanna allakkat angisuut 250 gram angullugit Kalaallit Nunatsinni timmisartukkut nassiunneqartartut nalingaat.
 
Frimærkit saqqummeersinneqartussat pillugit annertunerusumik www.stamps.gl -mi atuarit.

Apeqqutissallit TELE-POST-imi Tusagassiinermut pisortamut Malînánguaq M. Mølgaard-imut, tlf. +299 341255-imut email mmm@tele.gl –imut saaffiginnissinnaapput, imaluunniit Frimærkinik Tuniniaanermut pisortamut Allan Pertti Frandsen-imut tlf. +299 598755-imut, email apf@tele.gl -imut.