TELE-POST-p mobilt bredbånd atulersippaa

Mobilt Bredbånd atoraanni angerlarsimaffimmi allaffimmiluunniit pinngitsoorani isersimasariaaruppoq: Angalatilluni internetikkut allagarsiassaqarnerluni takuneqarsinnaavoq, alakkaaqattaartoqarsinnaalluni, allattoqarsinnaallunilu.

Mobilt Bredbånd qarasaasiamiit angallattakkamiit internetimi alakkaaqattaarnermut atussallugu naleqqulluinnartuuvoq, attavillu ADSL-imi internetimut aalaakkaasukkut attaveqarnertuulli isumannaatsigaaq. Internetimik atuineq paasiuminaallisagaavoq, taamaalilluni sunik alakkarterineq qanorluunniit allanneq takuneqarsinnaassanngilaq. Ledningeqanngitsumik attaviummat attaviup sukkassusaanut sumiinneq apeqqutaavoq. Nuuk tamarmi attaveqarfiusinnaavoq aammalu Akiani sumiiffiit ilai. Mobilt Bredbånd-eqaraanni internetimut isernissamut telefonimik ikkuffilimmik peqartariaqanngilaq, taamaallaat qarasaasiaqarnissaq aammalu mobilt bredbånd-imik atuisunngorsimanissaq pisariaqarlutik.

Ikkussuunnissaa pisariillunilu pilertornartuuvoq. Atorneqassapput USB modem-i aammalu poortugaq Mobilt Bredbånd-imik atuisunngornissamut atugassiaq najukkami TELE-POST Centerimi pisiarineqarsinnaasoq. Poortugaq aallartitsissut SIM-kortimik imaqarpoq USB-modem-imut ikkunneqartussamik, kingornagullu internetimut attaveqalerniaraanni qarasaasiamut ikkunneqartussaq.

Mobilt Bredbånd-imut periarfissat marluk pisiassaatigaagut, tassalu Basic-imik atuisunngorneq qaammammut 85 kr.-ilik MB-imullu ataatsimut 0,52 kr.-inik akilik aammalu Gold-imik atuisunngorneq qaammammut 695 kr.-ilik MB-nullu siullernut marlunnut MB-mut ataatsimut 0,35 kr.-inik akilik, kingornalu 0,52 kr.-inik. www.tele.gl-imi akit malitassallu pillugit annerusumik atuartoqarsinnaavoq.

Mobilikkut oqaluussaq isigalugu oqaluussineq paasissutissallu ingerlaartarneri sukkanerusut

TELE-POST-ip mobilinut attaveqaataata nutaap 3G-p mobilimi periarfissat nutaat pissanganartullu ammaappai.
Mobil video telefoni atorlugu atuisut maanna imminnut isigalutik oqaluussinnaanngorput, tamatumalu saniatigut attavigiinneq 25-riaammik sukkaneq, tassa 85 Kbit/s-it missaanninngaanniit 1 Mbit/s-inut, atorsinnaanngortipparput. Mobilillit matumuuna sukkasuumik internetimut isersinnaanngorput.

Mobil video telefonimik atuinermut aki GSM-ilinnut minutsimut 1,99 kr.-niussaaq aammalu TUSASS-ilinnut minutsimut 2,25 kr.-qassalluni.

Aallaqqaammut atuisunut Nuummi najugalinnut TELE-POST-ip attaveqaataa nutaaq 3G atorneqarsinnaassaaq. Neqeroorut taanna Nuummi iluatsissappat, kingusinnerusukkut sinerissami illoqarfiinni allani atuisut attavilerneqassapput.

Mobilinut attaveqaatip 3G-p saqqummiunneqarneranut atatillugu TELE-POST-ip aalajangiuppaa Telestyrelse-mut qinnutigineqassasoq GPRS-imi (mobilimi interneternermi) akit annertuumik appaaffigineqarnissaat.

”Atuisugut mobilillit mobiltelefoniminninngaanniit sukkasuumik internetersinnaalernissaannik periarfissikkusoqaagut, taamaalillutik mobilinut attaveqaatip nutaap 3G-p periarfissarititai pissanganartut atorsinnaaniassammatigit, akit siornatigumut naleqqiullugit allaanerulluinnartut atorlugit,” taama oqarpoq Tele-mut pisortaq Anders Barslund.

Allanik paasisaqarumagaanni pisortaanermut allatsi Jeppe Jensen e-mailikkut jeppe@tele.gl–imut imaluunniit telefon 341255 / 341101-imut sianerluni paasiniaasoqarsinnaavoq.

Inussiarnersumik inuulluaqqusilluta
TELE-POST