Dronningitta ukiuni 40-ni naalagaaffimmi qullersaanera kalaallit frimærkianni
Savalimmiuni aamma Danmarkimi allakkeriveqarfiit peqatigalugit POST Greenlandip Ataqqinartorsuup Dronningitta ukiuni 40-ni dronningiusimaneranut atasumik frimærkiliaq ullumikkut saqqummiuppaa.
04-01-12
Ataqqinartorsuaq Dronning assiliartaralugu frimærkiliaq angisooq kusanartorsuarlu POST Greenlandip ullumikkut saqqummiussinnaagamiuk tulluusimaarutigaa. Qalipaasup Mikael Melbye-p qalipagaa frimærkiliarineqarpoq, Martin Mörck-imiilli kigartugaavoq.
Frimærki Post Danmark aamma Posta Faroe Island suleqatigalugit saqqummersitaavoq. Frimærkimik saqqummiineq Ataqqinartorsuup naalagaaffimmi qullersatut ukiunik 40-nngortorsiorneranik malunnartitsineruvoq, pisoq persuarsiornartoq Naalagaaffeqatigiinnerup iluani tamarmi 2012-imi malunnartinneqartussaasoq.
Taamanikkut statsministeriusumit Jens Otto Kragh-imit suaarutigineqarluni Ataqqinartorsuaq Dronning Margrethe Aappaat (Margrethe Alexandrine Þórhildur Ingrid) Danmarkimut kunnginngormat ulloq 15. januar 1972, Kalaallit Nunaat aammalu Savalimmiut naalagaaffimmi qullersaqalerput kunngeqarfiup ilaanik avannarlermik assut pingaartitsisumik.
Dronning Margrethe Aappaat kalaallinit assorsuaq nuannarineqarpoq. Dronningip ilisimaneqaatigai Kalaallit Nunaannut angalasarnerpassuani, ilaatigut kitaani tunumilu kiisalu Kalaallit Nunaata avannarpasinnerusuani illoqarfinnik nunaqarfinnillu tikeraartarnerminik. Pingaartumik pisuni angisuuni marlunni Ataqqinartorsuarmik tikeraarneqarsimaneq immikkut nuannaarutigineqarsimavoq. Pisoq angisooq siulleq tassaavoq namminersornerulernermut inatsisip ulloq 1. maj 1979 taamani inatsisartut siulittaasuannut Lars Chemnitz-imut tunniunneqarnera, aammalu aappassaanik inatsisartut ataatsimiittarfianni tassani, namminersorneq pillugu inatsisip inatsisartut siulittaasuannut Josef Motzfeldt-imut tunniunneqarnera ulloq 21. juni 2009.
Uagut Kalaallit Nunaanniittugut Dronningerput nalliuttorsiorneranik pilluaqqungaarparput, aammalu Kalaallit Nunatsinnut aammaarluta tikilluaqqoqqinnissaa qilanaaralutigu.
Frimærkimik saqqummiineq pillugu annerusmik atuarit uani www.stamps.gl.
Apeqqutissallit TELE-POST-imi Attaveqatigiinnermut pisortamut Sæunn L. Nolsøe-mut, sunn@tele.gl, tlf. +299 341255, imaluunniit Frimærkinik tuniniaanermut pisortamut Allan Pertti Frandsen-imut, apf@tele.gl, tlf. +299 598755, saaffiginneqquneqarput.
Inussiarnersumik inuulluaqqusilluta / Med venlig hilsen
Per Svendsen, Postdirektør