Greenland Connect-ip immap naqqata iluatigoortunngornissaanut qillerinissaq

Ataasinngorneq 20. februar 2012 pukkitsormiut suliffeqarfiutaannik Visser & Smit Hanab-imik, VSH-mik, qillerinissaq pillugu isumaqatigiittoqarpoq. Suliffeqarfik qillerinermik ilisimasaqarluartuuvoq, suliallu taamatut ittut ilaatigut uuliasiorfinnut suliarisarsimallugit.

Kalaallit Nunaata imaatigut kabeliata sikunit saatsersunit 2011-mi ajoquserneqarneratut pisoqaqqinnginnissaanut suliffeqarfimmik piukkunnarluartumik suliarinnittussarsinera, TELE-POST-ip nuannaarutigaa. Imaatigut kabelimik illersuusiineq pitsaanerpaaq tassaavoq, kabelip immap itisuup naqqata iluatigoortunngorlugu qillerinissaq, TELE-POST-imi teknikkimut direktøri Jørn Jespersen oqarpoq.

”Greenland Connect ukiut pingasut matuma siornali atulerami Kalaallit Nunaannut aammalu TELE-POST-imut assut iluatsissimavoq. Nuup kangerluani itisuumi immap naqqani qaarsup ataanut kabelip nunnigunneqarfiisa qillerunneqarlutik isumannaannerulernissaannik Visser & Smit Hanab-imik ullumikkut isumaqatigiissuteqarnerput assut nuannarutigaara,” Jørn Jespersen oqarpoq.

TELE-POST-ip siunnersuisarfik Sound and Sea Technology, SST, suleqatigalugu suliassaq suliarinnittussarsiuuppaat, siunnersuisarfimmiillu oqaatigineqarpoq kabelip immap naqqata iluatigoortunngorlugu suliarineqarnerata kabeli illersorluassagaa siunissamilu aaqqissuisariaqalersinnaanerit annertuumik annikillisissallugit.

”Kalaallit Nunaanni attaveqaateqarnerup isumannaannerulersinneranut peqataanerput nuannaarutigaarput, ” Judith Meggitt SST-mi allaffissornermi pisortaaneq oqarpoq.

Visser & Smit Hanab-ikkut suliassaq qilanaaraat, qillerinissamillu suliarinnittussatut toqqarneqarnertik nuannaarutigalugu.

”Teknologii atorlugu assaanertaqanngitsumik attaveqaateqarnermik suliassanik tutsuiginartumik suliaqartarnissamik anguniagaqarnitsinnut isumaqatigiissut manna alloriaqqiffiuvoq,” Hans Blok Visser & Smit Hanab-imi qillerinermut immikkoortoqarfimmi pisortaaneq oqarpoq.

Piffissamik pilersaarutip malinneqarnissaa naatsorsuutigalugu suliassaq 35 millioner kroninut missingersuusiorneqarpoq. Suliassaq majimi aallartissaaq, suliaqarfik Nuummi Sanap kangerliumarngani sissap avataatungaani inissinneqassalluni, qillerinertaalu nammineq ullut 40-t missaannik sivisussuseqassaaq. Kabelip nunnigunneqarfia nutaaq kingusinnerusukkut Nuup avataatungaani immap naqqani Greenland Connect-imut katigutsinneqassaaq.

2012-imi ukiakkut naammassisimanissaq TELE-POST-ip pilersaarutigaa.

Kalaallit Nunaanni attaveqaammik atuisut allannguineq malussarfigissagaat TELE-POST-ip naatsorsuutiginngilaa. Imaatigut kabeli USA-mut Europa-mullu aammattaaq attaviligaavoq, taamaalillutik Kalaallit Nunaanni atuisut tamarmik allannguinerup nalaani internetimut, VPN-imut isersinnaajuassapput aammalu telefonimik atuisinnaajuassallutik. 

Allanik paasisaqarumaguit Teknikkimut pisortaaneq Jørn Jespersen, jjes@tele.gl, tlf. +299 551315-imut imaluunniit Attaveqatigiinnermut pisortaq Sæunn L. Nolsøe, sunn@tele.gl, tlf. +299 555245-mut attavigisinnaavatit.

Inussiarnersumik inuulluaqqusilluta
TELE-POST